کراچی (11 ستمبر 2025): وزیراعلیٰ سندھ سید مراد علی شاہ نے بابائے قوم قائداعظم محمد علی جناح کی 77ویں برسی کے موقع پر مزار قائد پر حاضری دی اور انہیں خراجِ عقیدت پیش کیا۔ وزیراعلیٰ کے ہمراہ صوبائی کابینہ کے اراکین بھی موجود تھے جنہوں نے پھولوں کی چادر چڑھائی اور فاتحہ خوانی کی۔
وزیراعلیٰ نے قائداعظم کی قربانیوں اور بے مثال قیادت کو خراجِ تحسین پیش کرتے ہوئے کہا کہ قائداعظم کے اصولوں پر عمل پیرا ہو کر ہی ملک کو ترقی اور استحکام دیا جا سکتا ہے۔
انہوں نے کہا، “قائداعظم کے خواب کی تعبیر ہمارے نوجوانوں کی محنت، لگن اور عزم میں مضمر ہے، ہمیں چاہیے کہ ہم ان کے نقشِ قدم پر چلتے ہوئے پاکستان کو مضبوط اور خوشحال بنائیں۔”
وزیراعلیٰ سندھ نے عوام سے اپیل کی کہ وہ قائداعظم کے نظریات اور تعلیمات کو اپنی زندگیوں میں شامل کریں تاکہ پاکستان حقیقی معنوں میں ایک خوشحال، پرامن اور ترقی یافتہ ملک بن سکے۔
