طیفی بٹ کی دبئی سے ڈرامائی انداز میں گرفتاری

لاہور : امیر بالاج قتل کیس کے مرکزی ملزم طیفی بٹ کی دبئی سے ڈرامائی انداز میں گرفتاری کی اندرونی کہانی سامنے آگئی۔
تفصیلات کے مطابق بالاج قتل کیس کے مرکزی ملزم طیفی بٹ کی دبئی میں گرفتاری کا احوال سامنے آگیا۔
پولیس نے بتایا کہ ملزم ایک دعوت کے دوران ڈرامائی انداز میں گرفتار ہوا، ڈی ایس پی خالد وریا پہلے سے دو ملزمان کی گرفتاری کے سلسلے میں دبئی میں موجود تھے۔
انہوں نے دبئی پولیس کے ساتھ مشترکہ کارروائی کی جس دوران طیفی بٹ بھی ایک فلیٹ میں موجود تھا، خالد وریا نے ملزم کو پہچان کر دبئی پولیس کو اطلاع دی جس پر کارروائی کرتے ہوئے اسے گرفتار کر لیا گیا۔
پولیس ذرائع کا کہنا تھا طیفی بٹ اس وقت دبئی پولیس کی حراست میں ہے، لاہور پولیس نے اس کی گرفتاری کے لیے پہلے ہی ریڈ وارنٹ جاری کر رکھے تھے۔ ریڈ وارنٹ کی بنیاد پر پاکستان منتقلی کا عمل شروع کر دیا گیا ہے، ریڈ وارنٹ مکمل ہونے پر لاہور ائیرپورٹ لایا جائے گا۔
ذرائع کے مطابق بالاج قتل کے فوری بعد طیفی بٹ اسلام آباد سے گلاسکو روانہ ہوا تھا ، جس کے بعد برطانیہ میں مقیم تھا، تاہم ویزہ ختم ہونے پر دبئی آگیا تھا، تمام قانونی کارروائی مکمل ہونے کے بعد طیفی بٹ کو پاکستان لایا جائے گا۔