آئی سی سی مینز ٹی 20 ورلڈ کپ سے قبل سری لنکن کرکٹ ٹیم میں بڑی تبدیلی کرتے ہوئے کپتانی تبدیل کر دی گئی ہے۔ سری لنکا کرکٹ بورڈ نے چرِتھ اسالنکا کو قیادت سے ہٹا کر داسن شناکا کو ایک بار پھر ٹی 20 ٹیم کا کپتان مقرر کر دیا ہے۔
کرک انفو کے مطابق سری لنکا کرکٹ ٹیم کی قیادت آئندہ برس فروری میں شیڈول آئی سی سی مینز ٹی 20 ورلڈ کپ کے لیے داسن شناکا کے سپرد کر دی گئی ہے، جو ٹورنامنٹ کے اختتام تک ٹیم کی کپتانی کے فرائض انجام دیں گے۔
رپورٹ کے مطابق کپتانی میں اس تبدیلی کا فیصلہ سابق سلیکشن کمیٹی کی مدت مکمل ہونے کے باعث تاخیر کا شکار رہا، جس کی سربراہی اپُل تھارنگا کر رہے تھے۔
ورلڈ کپ کے لیے ابتدائی اسکواڈ کے اعلان کے موقع پر سری لنکن کرکٹ ٹیم کے نئے چیف سلیکٹر پرامودیا وکرما سنگھے نے تصدیق کی کہ ٹی 20 ٹیم کی قیادت داسن شناکا ہی کریں گے۔ ان کے مطابق یہ فیصلہ ہیڈ کوچ سنتھ جے سوریا سے مشاورت کے بعد کیا گیا ہے۔
کرکٹ ماہرین کے مطابق ورلڈ کپ سے قبل کپتانی میں یہ تبدیلی ٹیم کے تجربے اور توازن کو مدنظر رکھتے ہوئے کی گئی ہے۔
