بالی ووڈ کے مرحوم اداکار سوشانت سنگھ راجپوت کے اہل خانہ نے ان کی موت سے متعلق سی بی آئی کی کلوزر رپورٹ کو چیلنج کرنے کا فیصلہ کیا ہے۔ بھارتی میڈیا رپورٹس کے مطابق اہل خانہ کا کہنا ہے کہ ادارے کی جانب سے جاری کردہ رپورٹ “نامکمل اور گمراہ کن” ہے۔
سی بی آئی نے مارچ 2025 میں اپنی رپورٹ میں نتیجہ اخذ کیا تھا کہ سوشانت کی موت خودکشی تھی اور ان کی سابقہ ساتھی ریا چکرورتی یا اہل خانہ کے خلاف کسی قسم کے جرم، اکسانے یا مالی بدعنوانی کے شواہد نہیں ملے۔
تاہم سوشانت کے اہل خانہ نے اس رپورٹ کے نتائج کو مسترد کرتے ہوئے کہا کہ تحقیقات شفاف انداز میں نہیں کی گئیں اور رپورٹ میں بینک اسٹیٹمنٹس، ڈیجیٹل ریکارڈز اور دیگر اہم شواہد شامل نہیں کیے گئے۔
اہل خانہ نے اس معاملے پر 20 دسمبر کو پٹنہ کی عدالت میں سماعت کا اعلان کیا ہے، جہاں وہ رپورٹ کے خلاف احتجاجی درخواست دائر کریں گے۔
