صبح سویرے شہر کے مختلف علاقوں میں رم جھم سے موسم خوشگوار

کراچی(15 ستمبر 2025): صبح سویرے شہر کے مختلف علاقوں میں رم جھم سے موسم خوشگوار ہوگیا۔
تفصیلات کے مطابق پیر کی صبح کراچی کے گولیمار، گارڈن، صدر، گلستان جوہر، گلشن اقبال اور کورنگی لانڈی کے اطراف بونداباندی سے موسم خوشگوار ہوگیا ہے۔
محکمہ موسمیات کا کہنا ہے کہ نمی کا تناسب زائد ہونے سے بادل تشکیل پاتے ہیں اور آج دن بھر موسم مرطوب رہنے کے ساتھ بوندا باندی یا بارش ہو سکتی ہے۔
محکمہ موسمیات کے مطابق کراچی میں آج زیادہ سے زیادہ درجہ حرارت 33 ڈگری سینٹی گریڈ تک جا سکتا ہے اور اس وقت ہوا میں نمی کا تناسب 83 فیصد ہے اور جنوب مغرب سے ہوائیں 19 کلومیٹر فی گھنٹہ کی رفتار سے چل رہی ہیں۔
محکمہ موسمیات نے بتایا کہ رواں سال مون سون سیزن 30 ستمبر تک وقفے وقفے سے بادل برساتا رہے گا تاہم شہر میں فی الحال تیز بارش کا کوئی امکان نہیں ہے۔
دوسری جانب ملک کے بیشتر علاقوں میں موسم گرم اور خشک رہنے کا امکان ہے، پنجاب کے اکثر اضلاع میں موسم خشک رہے گامری، گلیات، راولپنڈی، جہلم، اٹک میں بارش کا امکان ہے۔
محکمہ موسمیات کا کہنا ہے کہ دیر، سوات، کوہستان، مانسہرہ، ایبٹ آباد اور وزیرستان میں تیز ہواؤں اور بارش متوقع ہے، سندھ میں موسم خشک رہے گا، تاہم ساحلی علاقوں میں بوندا باندی کا امکان ہے۔
بلوچستان کے بیشتر اضلاع میں موسم خشک رہے گا جبکہ کشمیر اور گلگت بلتستان میں چند مقامات پر بارش کی پیشگوئی کی ہے، سیلاب سے متاثرہ پنجاب کے اضلاع میں آئندہ دنوں کے دوران موسم گرم اور خشک رہے گا۔