کراچی: محکمہ تعلیم سندھ نے آکسفورڈ یونیورسٹی کے لیے اسکالرشپ کا باضابطہ اعلان کر دیا ہے۔
محکمہ تعلیم کے ترجمان کے مطابق گریجویٹ، ماسٹرز، ایم فل اور پی ایچ ڈی پروگرامز کے امیدوار اس اسکالرشپ کے لیے درخواست دے سکتے ہیں۔ اسکالرشپ حاصل کرنے کے لیے سندھ کا ڈومیسائل اور قومی شناختی کارڈ لازمی شرط قرار دی گئی ہے، جبکہ امیدوار کا آکسفورڈ یونیورسٹی کے میرٹ پر پورا اترنا اور انگریزی زبان میں مہارت بھی ضروری ہوگی۔
ترجمان کا کہنا ہے کہ درخواست دہندگان میں سے شارٹ لسٹ امیدواروں کو انٹرویو کے بعد حتمی طور پر منتخب کیا جائے گا۔ یہ اسکالرشپ بلاول بھٹو اور وزیراعلیٰ سندھ کے حالیہ آکسفورڈ یونیورسٹی دورے کے تناظر میں دی جا رہی ہے۔
