محکمہ موسمیات نے ملک کے بیشتر علاقوں میں آئندہ 24 گھنٹوں کے دوران سردی کی شدت برقرار رہنے کی پیشگوئی کر دی ہے۔ محکمہ موسمیات کے مطابق پہاڑی علاقوں میں موسم شدید سرد رہے گا جبکہ گلگت بلتستان، بالائی خیبرپختونخوا اور آزاد کشمیر کے چند مقامات پر بارش اور ہلکی سے درمیانی برفباری متوقع ہے۔
محکمہ موسمیات کا کہنا ہے کہ شمال مغربی بلوچستان میں بھی چند مقامات پر بارش جبکہ پہاڑوں پر ہلکی برفباری کا امکان ہے۔ پنجاب، سندھ اور خیبرپختونخوا کے میدانی علاقوں میں اسموگ اور دھند چھائے رہنے کی پیشگوئی کی گئی ہے جس کے باعث حدِ نگاہ متاثر ہو سکتی ہے۔
محکمہ موسمیات کے مطابق 14 سے 15 دسمبر کے دوران بلوچستان کے مختلف اضلاع میں بارش اور برفباری متوقع ہے، جبکہ راولپنڈی، اسلام آباد اور پشاور میں بوندا باندی اور مری میں ہلکی بارش اور برفباری کا امکان ظاہر کیا گیا ہے۔ مزید بتایا گیا ہے کہ 19 دسمبر سے مغربی ہواؤں کا ایک اور سلسلہ ملک میں داخل ہونے کا امکان ہے۔
دوسری جانب نیشنل ایمرجنسی آپریشن سینٹر کی جانب سے ایڈوائزری جاری کر دی گئی ہے۔ ترجمان این ڈی ایم اے کے مطابق 18 دسمبر تک ملک کے مختلف علاقوں میں بارش اور پہاڑوں پر برفباری کا امکان ہے، جس کے باعث پہاڑی راستوں پر ٹریفک کی روانی متاثر اور بعض مقامات پر سڑکیں بند ہونے کا خدشہ ہے۔
این ڈی ایم اے کے مطابق بالائی خیبرپختونخوا، کوہستان، گلگت بلتستان، آزاد کشمیر اور بلوچستان کے مختلف علاقوں میں بارش اور برفباری متوقع ہے۔ ممکنہ موسمی صورتحال کے باعث دھند کی شدت میں بھی اضافہ ہو سکتا ہے، جبکہ پہاڑی اور بالائی علاقوں میں شدید برفباری کا امکان ظاہر کیا گیا ہے۔
ایڈوائزری کے مطابق 16 سے 18 دسمبر کے دوران برفباری کی شدت میں کمی متوقع ہے تاہم سردی کی شدت برقرار رہنے کا امکان ہے۔ شہریوں کو خراب موسمی حالات کے دوران پہاڑی علاقوں کا غیر ضروری سفر نہ کرنے کا مشورہ دیا گیا ہے جبکہ متعلقہ اداروں کو ہنگامی صورتحال سے نمٹنے کے لیے پیشگی تیاری رکھنے کی ہدایت کی گئی ہے۔
