رعایتی قرض پروگرام : پاکستان اور ڈنمارک کے درمیان بڑا معاہدہ

پاکستان اور ڈنمارک کےدرمیان رعایتی قرض پروگرام کے معاہدے طے پاگیا، جو پاکستان کے ترقیاتی شعبے میں طویل عرصے بعد پہلا منصوبہ ہے۔
تفصیلات کے مطابق پاکستان اور ڈنمارک کے درمیان فیصل آباد کے مشرقی علاقے میں ویسٹ واٹر ٹریٹمنٹ پلانٹ لگانے کے معاہدے پر دستخط ہوگئے۔
یہ معاہدہ ڈنمارک حکومت کے رعایتی قرض پروگرام “ڈینیڈا سسٹین ایبل انفراسٹرکچر فنانس (DSIF)” کے تحت کیا گیا ہے۔
معاہدے پر سیکرٹری وزارتِ اقتصادی امور محمد حمیر کریم، ڈی ایس آئی ایف کی مینیجنگ ڈائریکٹر ٹینا کلرپ ہاؤسن اور ڈینسکے بینک کے منیجنگ ڈائریکٹر جیسپر پیٹرسن نے دستخط کیے۔ منصوبے کے تحت روزانہ 33 ملین گیلن پانی کو صاف کیا جائے گا۔
یہ ڈنمارک کی جانب سے پاکستان کے ترقیاتی شعبے میں طویل عرصے بعد پہلا منصوبہ ہے اور پاکستان-ڈنمارک فریم ورک معاہدے (2022) کے تحت دیا جانے والا پہلا قرض بھی ہے۔
حکام کے مطابق یہ منصوبہ شہری انفراسٹرکچر کو مضبوط بنانے، ماحولیاتی تحفظ یقینی بنانے اور صحتِ عامہ کے مسائل کے حل میں اہم کردار ادا کرے گا