ریڈیالوجی کا عالمی دن

ریڈیالوجی کا عالمی دن ہر سال 8 نومبر کو دنیا بھر میں منایا جاتا ہے تاکہ ریڈیالوجسٹ اور تصویری تشخیص کے ماہرین کی خدمات کو سراہا جا سکے۔ ریڈیالوجی وہ شعبہ ہے جو انسانی جسم کے اندرونی حصوں کی جانچ کے لیے ایکس رے، الٹراساؤنڈ، سی ٹی اسکین، ایم آر آئی جیسی جدید ٹیکنالوجیز استعمال کرتا ہے۔
یہ دن ایکسرے کے موجد کو خراج تحسین پیش کرنے کے لئے منایا جاتا ہے جرمنی سے تعلق رکھنے والے ولہیم کانراڈ نامی فزیسٹ نے 8 نومبر 1895 کو یہ شعائیں دریافت کی تھیں ،جس کے بعد ریڈیالوجی کا ایک پورا شعبہ وجود میں آگیا ۔آج دنیا کے ہر خطے میں لوگ اس سے مستفید ہو رہے ہیں۔ اس دن کو منانے کا مقصد
بیماریوں کی بروقت شناخت میں ریڈیالوجسٹ کے کردار کو اجاگر کرنا،جدید طبی ٹیکنالوجی کے ذریعے صحت کے شعبے میں ہونے والی پیش رفت کو نمایاں کرنا، عوام میں شعور پیدا کرنا کہ ریڈیالوجی نہ صرف تشخیص بلکہ علاج کے منصوبے میں بھی مددگار ہے۔
ریڈیالوجی کو خصوصاً آج کے دور میں بہت سی بیماریوں کی تشخیص کے لئے ایک بڑا اہم اور بہترین ذریعہ مانا جاتا ہے۔اس شعبے میں مزید تحقیق کا عمل جاری ہے اور انسان اپنی ضرورت کے مطابق طب کے سلسلے میں نئی سے نئی ایجادات کر رہاہے۔ریڈیالوجسٹ کی خدمات کو سراہنے کے لیے پاکستان سمیت دنیا بھر کے اسپتالوں اور تحقیقی اداروں میں سیمینارز ،ورکشاپ اور اعزازی تقریبات منعقد کی جاتی ہیں۔ریڈیالوجی کے عالمی دن کا پیغام یہ ہے کہ صحت کا تحفظ اور بیماریوں کی شناخت میں ریڈیالوجی کا کردار انمول ہے۔ یہ دن ہمیں یاد دلاتا ہے کہ جدید ٹیکنالوجی اور ماہرین کی محنت کے بغیر صحت کی بہتر سہولیات ممکن نہیں۔