اسلام آباد: پاکستان انٹرنیشنل ایئرلائنز نے مانچسٹر کے بعد اسلام آباد سے لندن کے لیے بھی پروازیں شروع کرنے کا اعلان کر دیا ہے۔ قومی ائیرلائن کے ترجمان کے مطابق اسلام آباد سے لندن کے لیے ہفتہ وار چار پروازیں آپریٹ کی جائیں گی۔
ترجمان نے بتایا کہ لندن کی تمام پروازیں ہیتھرو ایئرپورٹ کے جدید ترین ٹرمینل 4 سے آپریٹ ہوں گی، جس سے مسافروں کو بہتر سہولیات میسر آئیں گی۔ ان کے مطابق پی آئی اے کی اسلام آباد سے لندن کے لیے پہلی پرواز 29 مارچ کو روانہ ہو گی۔
ترجمان پی آئی اے کا کہنا تھا کہ قومی ائیرلائن پہلے ہی مانچسٹر کے لیے ہفتہ وار تین پروازیں آپریٹ کر رہی ہے، جنہیں مسافروں کی جانب سے مثبت ردعمل ملا ہے۔
واضح رہے کہ وزیر دفاع خواجہ آصف نے اکتوبر 2025 میں اسلام آباد سے مانچسٹر کے لیے ہفتہ وار تین پروازوں کا افتتاح کیا تھا، جس کے بعد پی آئی اے کی پہلی پرواز مانچسٹر پہنچی تھی۔
پی آئی اے انتظامیہ کے مطابق لندن روٹ کی بحالی سے برطانیہ میں مقیم پاکستانیوں کو سفری سہولت ملے گی اور قومی ائیرلائن کے بین الاقوامی آپریشنز کو مزید فروغ حاصل ہوگا۔
