پیپلزپارٹی نے آزادکشمیر میں حکومت سازی کےلیے نمبرز پورے کر لیے

پیپلزپارٹی نے دعویٰ کیا ہے کہ آزادکشمیر میں حکومت سازی کےلیے نمبرز پورے کر لیے۔
ذرائع کے مطابق آزاکشمیر میں حکومت سازی کے لیے پیپلزپارٹی کی جانب سے بڑی پیش رفت سامنے آئی ہے جس میں پی پی ن لیگ کے بغیر حکومت بنانے کی پوزیشن میں آگئی ہے۔
یہ پیش رفت اس وقت ہوئی جب فریال تالپور نے اسلام آباد میں واقع سندھ ہاؤس میں ڈیرے جمائے اور حکومت سازی کے لیے سیاسی رہنماوں اور آزاد اراکین سے رابطے کیے۔
پی پی رہنما فریال تالپور سے آزاد کشمیر کے وزرا کے وفود نے الگ الگ ملاقاتیں کیں جن میں فہیم اختر ربانی، محمدعاصم شریف، چوہدری محمد اکبر اور عبدالمجیدخان، چوہدری یاسرسلطان، سردار محمدحسین، چوہدری اخلاق، چوہدری ارشد، چوہدری رشید شامل ہیں اور پیپلزپارٹی میں شمولیت کا اعلان کیا۔
فریال تالپور نے پیپلزپارٹی میں شامل ہونے والے رہنماؤں کا خیرمقدم کیا ہے۔
پی پی نے آزادکشمیر میں ن لیگ کے بغیر حکومت سازی کیلئے نمبرز پورے کیے ہیں اور اب اسے وفاقی حکومت میں اتحادی ن لیگ سے مدد کی ضرورت نہیں ہو گی۔
وزرا نے چیئرمین بلاول بھٹو اور صدر آصف علی زرداری کی قیادت پر مکمل اعتماد کا اظہار کرتے ہوئے کہا ہے کہ آزادکشمیر کی ترقی ،عوامی خدمت کیلئے پیپلزپارٹی کے پلیٹ فارم سے بھرپور کردار ادا کریں گے۔
واضح رہے کہ پاکستان پیپلز پارٹی نے آزاد کشمیر حکومت کی تبدیلی کا فیصلہ کیا تھا، گزشتہ روز ایوان صدر میں پیپلز پارٹی آزاد کشمیر کی بڑی بیٹھک کے دوران صدرِ مملکت آصف زرداری نے بتایا تھا کہ یہ فیصلہ بلاول بھٹو نے کیا تھا۔
آصف علی زرداری نے کہا کہ آزاد کشمیر میں حکومت سازی کا فیصلہ غیر معمولی ہے، پی پی مشکل حالات میں حکومت سنبھالنے جا رہی ہے، یہ پارٹی اور آپ سب کے لیے بھاری ذمہ داری ہے، یقین ہے پی پی ماضی کی طرح ڈلیور کرے گی۔
انھوں نے کہا پارلیمانی پارٹی قبل از وقت غیر ضروری بیان بازی اور وزیر اعظم، اسپیکر، وزرا کے لیے ناموں پر چہ مہ گوئیوں سے گریز کرے، آزاد کشمیر کا اگلا وزیر اعظم ایک عام ورکر اور جیالا ہوگا