کوئٹہ کے نواحی علاقے ہنہ اوڑک میں مسلح افراد کی فائرنگ کے نتیجے میں 3 افراد جاں بحق جبکہ 8 دیگر زخمی ہو گئے، جس کے بعد علاقے میں شدید کشیدگی پھیل گئی۔
واقعے کے خلاف مقامی شہریوں نے ائیرپورٹ روڈ پر احتجاجی دھرنا دے کر سڑک کو ہر قسم کی ٹریفک کے لیے بند کر دیا اور ملزمان کی فوری گرفتاری کا مطالبہ کیا۔
واقعے کے بعد صوبائی وزیر داخلہ ضیاء اللہ لانگو نے متاثرہ علاقے کا دورہ کیا، جہاں انہوں نے کلی بابری میں قبائلی عمائدین اور نوجوانوں سے ملاقات کی۔ اس موقع پر انہوں نے امن و امان کی صورتحال بہتر بنانے کے لیے مشترکہ سکیورٹی چیک پوسٹ قائم کرنے کی یقین دہانی بھی کرائی۔
دوسری جانب گورنر بلوچستان جعفر خان مندوخیل نے ہنہ اوڑک میں ہونے والے دہشتگرد حملے کی شدید مذمت کرتے ہوئے قیمتی انسانی جانوں کے ضیاع پر گہرے رنج و غم کا اظہار کیا۔ انہوں نے متعلقہ اداروں کو ہدایت کی کہ حملے میں ملوث عناصر کو فوری گرفتار کر کے قانون کے کٹہرے میں لایا جائے۔
