پاکستان کیلئے آئی ایم ایف ایگزیکٹو بورڈ کا اجلاس

اسلام آباد : پاکستان کیلئے آئی ایم ایف ایگزیکٹو بورڈ کا اجلاس 8 دسمبر کو ہوگا ، جس میں 1.2 ارب ڈالر کی منظوری کا امکان ہے۔
تفصیلات کے مطابق بین الاقوامی مالیاتی فنڈ (آئی ایم ایف) نے اپنے آئندہ ایگزیکٹو بورڈ اجلاسوں کا شیڈول جاری کر دیا، جس کے تحت پاکستان کیلئے آئی ایم ایف ایگزیکٹو بورڈ کا اجلاس 8 دسمبر کو ہوگا۔
ذرائع کا کہنا ہے کہ اجلاس میں ایگزیکٹو بورڈ 1.2 ارب ڈالر کی منظوری دےسکتا ہے ، جس میں موجودہ قرض پروگرام کی 1ارب ڈالر کی قسط اور موسمیاتی تبدیلی پر آر ایس ایف فنڈ کی 20 کروڑ ڈالر کی پہلی قسط جاری ہوسکتی ہے۔
یاد رہے کہ 15 اکتوبر کو پاکستان اور آئی ایم ایف کے درمیان اسٹاف لیول معاہدہ طے پایا تھا، جس کے تحت عالمی ادارہ پاکستان کو اضافی 1.2 ارب ڈالر فراہم کرے گا۔
آئی ایم ایف کا کہنا تھا کہ پاکستان نے تمام معاشی اہداف کامیابی سے پورے کیے، جب کہ ادارے کے مشن نے 24 ستمبر سے 8 اکتوبر تک پاکستان میں رہ کر معاشی کارکردگی کا جائزہ لیا۔ بعد ازاں مزید مشاورت کے بعد معاہدہ حتمی شکل اختیار کر گیا۔
رپورٹ کے مطابق پاکستان نے سیلاب کے باوجود 1.6 فیصد پرائمری سرپلس حاصل کیا، جب کہ ٹیکس اصلاحات پر عملدرآمد بھی جاری ہے۔ واقی و صوبائی حکومتوں نے مشترکہ طور پر سیلاب سے متاثرہ علاقوں کی بحالی کے لیے فنڈز مختص کیے ہیں۔
آئی ایم ایف نے پاکستان کی سماجی شعبے میں کامیابیوں کو بھی سراہا، خاص طور پر بینظیر انکم سپورٹ پروگرام میں اضافہ، تعلیم اور صحت کے شعبوں میں بروقت اقدامات کو مثبت پیشرفت قرار دیا۔