پاکستان اور امریکا میں معدنیات سے متعلق مفاہمتی یادداشت پر دستخط

وزیراعظم ہاؤس میں یو ایس اسٹریٹجک میٹلز اور ایف ڈبلیو او میں دستخط ہوئے، امریکی وفد نے اہم معدنیات کی ترقی اور لاجسٹکس پر دو مفاہمتی یادداشتوں پر دستخط کیے۔
ناظم الامور نیٹلی بیکر کا کہنا ہے کہ معاہدہ پاک امریکا تعلقات کی مضبوطی کی مثال ہے، یو ایس اسٹریٹجک میٹلز اہم معدنیات کی پیداوار اور ری سائیکلنگ پر فوکس کرے گی۔
انہوں نے کہا کہ اہم معدنی وسائل امریکی سلامتی اور خوشحالی کے لیے ناگزیر ہیں، پاکستان میں یو ایس اسٹریٹجک میٹلز اور ایف ڈبلیو او کے مزید معاہدوں کی توقع ہے۔
واضح رہے کہ امریکا کا اعلیٰ سطح وفد 7 سے 9 ستمبر تک پاکستان کے دورے پر ہے، وفد میں یو ایس اسٹریٹیجک میٹلز اور موٹہ اینگل کمپنیوں کے اراکین شامل ہیں۔
وزیراعظم، فیلڈ مارشل، وزیر پیٹرولیم اور وزیر تجارت سے امریکی وفد کی ملاقاتیں ہوئیں جس میں امریکی وفد کو پاکستان کے معدنی ذخائر بشمول تانبا، سونا اور نایاب عناصر پر بریفنگ دی گئی۔
ملاقاتوں میں معدنی وسائل اور انفرااسٹرکچر  میں سرمایہ کاری کے مواقع پر گفتگو ہوئی، امریکی کمپنیوں نے معدنیات کی پروسیسنگ اور بنیادی ڈھانچے میں سرمایہ کاری پر آمادگی ظاہر کی