یو اے ای میں کھیلے جا رہے ایشیا کپ 2025 میں پاک بھارت ٹاکرے میں بھارتی کھلاڑیوں نے پاکستانی کرکٹرز سے مصافحہ نہ کر کے آئی سی سی کوڈ آف کنڈکٹ کی خلاف ورزی کی ہے۔ انڈین ٹیم کے اسپورٹس مین اسپرٹ کے منافی اس فعل پر بھارتی کرکٹ بورڈ نے اپنا ردعمل دیا ہے۔
بھارتی میڈیا کے مطابق بی سی سی آئی کے ایک سینئر عہدیدار نے اس تنازع پر کہا ہے کہ کرکٹ میچ میں حریف ٹیموں کے کھلاڑیوں کا آپس میں مصافحہ کرنا صرف جذبہ خیر سگالی کا اظہار ہے، لیکن لازمی نہیں ہے۔
بھارتی بورڈ نے ہٹ دھرمی کا مظاہرہ کرتے ہوئے کہا کہ کرکٹ کے قوانین میں کہیں نہیں لکھا کہ میچ کے بعد کھلاڑی ایک دوسرے سے ہاتھ ملائیں گے۔ اگر قانون میں اس کی وضاحت نہیں تو بھارتی ٹیم اس بات کی پابند بھی نہیں۔
بی سی سی عہدیدار نے انڈین ٹیم کا دفاع کرتے ہوئے کہا کہ بھارتی کرکٹرز نے پاکستانی کھلاڑیوں سے ہاتھ نہ ملا کر کوئی غلط کام نہیں کیا۔
واضح رہے کہ بھارتی کرکٹرز کے میدان میں پاکستانی کھلاڑیوں سے مصافحہ نہ کرنے اور کپتان سوریا کمار یادیو کی جانب سے جیت کے بعد سیاسی بیان پر پاکستان کرکٹ بورڈ نے سخت ایکشن لیتے ہوئے آئی سی سی سے میچ ریفری اینڈی کرافٹ کو ایشیا کپ سے ہٹانے کا مطالبہ اور بصورت دیگر ٹورنامنٹ سے دستبرداری کی دھمکی دی ہے۔
دوسری جانب آئی سی سی کی جانب سے یہ مطالبہ مسترد کرنے پر پاکستان ٹیم کی آج پری میچ پریس کانفرنس بھی منسوخ کر دی گئی ہے جب کہ پی سی بی حکام سر جوڑ کر بیٹھ گئے ہیں۔ چیئرمین محسن نقوی کا وزیراعظم سے ملاقات کا امکان ہے۔ حکومت سے مشاورت کے بعد ہی ایشیا کپ سے دستبرداری کا حتمی فیصلہ کیا جائے گا۔
