نجی اسکول میں کھلونا بم پھٹنے سے 4 طالبعلم زخمی

خیبر : جمرود کے نجی اسکول میں کھلونا بم پھٹنے سے 4 طالبعلم زخمی ہوگئے ، جنہیں فوری طور پر طبی امداد کے لیے قریبی میڈیکل کمپلیکس منتقل کردیا گیا۔
تفصیلات کے مطابق خیبرپختونخوا کے ضلع جمرود کے ایک نجی اسکول میں کھلونا بم پھٹنے سے 4 طالبعلم زخمی ہوگئے۔
پولیس نے بتایا کہ کلاس چہارم کے ایک طالبعلم نے اسکول آتے وقت راستے سے کھلونا بم اٹھایا اور کلاس میں زمین پر مارنے سے وہ اچانک پھٹ گیا۔
انتظامیہ کا کہنا ہے کہ دھماکے کے نتیجے میں چار بچے زخمی ہوئے، جنہیں فوری طور پر طبی امداد کے لیے قریبی میڈیکل کمپلیکس منتقل کردیا گیا۔
یاد رہے چند ماہ قبل شمالی وزیرستان کی تحصیل میرانشاہ میں ایک افسوسناک واقعہ پیش آیا تھا ، جہاں ایک گھر کے اندر کھلونا نما بم دھماکے میں دو کم سن بھائی زخمی ہوگئے۔
پولیس کے مطابق دھماکا سید جلال چیک پوسٹ کے قریب ایک رہائشی مکان میں اس وقت ہوا جب بچے ایک کھلونا نما بم سے کھیل رہے تھے۔
زخمی ہونے والوں کی شناخت جاوید ولد محمد عثمان عمر 8 سال اور خالد ولد محمد عثمان عمر 6 سال کے نام سے ہوئی تھی۔