اسلام آباد (13 نومبر 2025): وفاقی وزیر بحری امور جنید انوار چوہدری نے نئی بندرگاہوں کی تعمیر کیلیے کمیٹی قائم کر دی۔
جنید انوار چوہدری نے اپنے بیان میں کہا کہ نئی بندرگاہوں کا منصوبہ 16 سالہ وژن 2047 تا 2147 کا حصہ ہے، موجودہ بندرگاہیں 2035 سے 2045 کے درمیان مکمل گنجائش پر پہنچ جائیں گی۔
وفاقی وزیر نے کہا کہ بڑھتی تجارتی سرگرمیوں سے موجودہ بندرگاہوں پر دباؤ بڑھنے کا امکان ہے، نئے منصوبے پاکستان کو خطے کا سمندری مرکز بنانے کی سمت اہم قدم ہیں۔
کمیٹی ساحلی پٹی پر نئی ڈیپ سی پورٹس کے مقامات کی نشاندہی کرے گی جبکہ ماحولیاتی، جغرافیائی اور تکنیکی پہلوؤں کا تفصیلی جائزہ لے گی۔
جنید انوار چوہدری نے کمیٹی کو تین ماہ میں رپورٹ پیش کرنے کی ہدایت کر دی، رپورٹ میں نئے صنعتی زونز، توانائی مراکز اور لاجسٹک کنیکٹیویٹی کی تجاویز شامل ہوں گی۔
