مری اور اس کے مضافاتی علاقوں میں شدید اور طوفانی برفباری کا سلسلہ جاری ہے جبکہ ضلع انتظامیہ کے مطابق برفباری کا گزشتہ بیس سالوں کا ریکارڈ ٹوٹ چکا ہے۔ شدید موسم کے باعث مری کو ہائی الرٹ پر رکھا گیا ہے اور شہر کے اندر موجود تقریباً 5 ہزار گاڑیوں کو بحفاظت نکالنے کے لیے ریسکیو آپریشن شروع کر دیا گیا ہے۔
محکمہ موسمیات کے مطابق مری میں برفباری کا تیسرا اسپیل جاری ہے اور اب تک 2 سے 3 فٹ برف ریکارڈ کی جا چکی ہے۔ محکمہ کا کہنا ہے کہ برفباری کا سلسلہ رات تک جاری رہنے کا امکان ہے۔
انتظامیہ نے سیاحوں کے مری آمد پر پابندی عائد کر دی ہے جبکہ مقامی آبادی شدید مشکلات کا شکار ہے۔ علاقے میں نظام زندگی مکمل طور پر مفلوج ہو گیا ہے، بجلی گزشتہ رات سے مکمل طور پر بند ہے اور مری سمیت مضافاتی علاقوں میں انٹرنیٹ سروس بھی جزوی معطل ہے۔
