ملک کے مختلف شہروں میں وقفے وقفے سے بارش کا سلسلہ جاری ہے، جس کے باعث سردی کی شدت میں نمایاں اضافہ ہو گیا ہے۔
کوئٹہ اور گردونواح میں موسمِ سرما کی پہلی بارش ریکارڈ کی گئی، جہاں شہر کے مختلف علاقوں میں کہیں ہلکی تو کہیں تیز بارش ہوتی رہی۔ بارش کے باعث موسم خوشگوار ہو گیا جبکہ ٹھنڈ میں واضح اضافہ دیکھنے میں آیا ہے۔
سردی بڑھنے کے بعد شہریوں نے گرم کپڑوں کا استعمال شروع کر دیا ہے، تاہم بارش کے باعث کوئٹہ کے مختلف علاقوں میں بجلی کی آنکھ مچولی بھی جاری ہے، جس پر شہریوں نے شکایات کا اظہار کیا ہے۔
دوسری جانب شہریوں کی بڑی تعداد نے موسمِ سرما کی پہلی بارش پر اطمینان اور خوشی کا اظہار کیا ہے۔ مقامی افراد کا کہنا ہے کہ حالیہ بارشوں سے صوبے میں طویل عرصے سے جاری خشک سالی کے خاتمے کی امید پیدا ہو گئی ہے۔
اسی طرح وادیِ زیارت اور اس کے گردونواح میں بھی موسمِ سرما کی پہلی بارش کا سلسلہ جاری ہے، جس کے باعث سردی کی شدت میں کافی اضافہ ہو گیا ہے اور بالائی علاقوں میں ٹھنڈ مزید بڑھ گئی ہے۔
محکمہ موسمیات کے مطابق آئندہ دنوں میں بعض علاقوں میں مزید بارش کا امکان ہے، جس کے پیشِ نظر شہریوں کو احتیاطی تدابیر اختیار کرنے کی ہدایت کی گئی ہے۔
