بنگلادیش میں طلبہ تحریک کے سرکردہ رہنما اور انقلابی پلیٹ فارم انقلاب منچہ کے ترجمان شریف عثمان ہادی کو ڈھاکا میں سپردِ خاک کر دیا گیا۔
بنگلادیشی میڈیا کے مطابق قاتلانہ حملے میں شدید زخمی ہونے کے بعد سنگاپور میں دورانِ علاج دم توڑنے والے شریف عثمان ہادی کی نمازِ جنازہ بنگلادیشی پارلیمنٹ کے ساؤتھ پلازا میں ادا کی گئی۔
میڈیا رپورٹس کے مطابق نمازِ جنازہ میں بنگلادیش کے چیف ایڈوائزر محمد یونس سمیت ہزاروں افراد نے شرکت کی۔ نمازِ جنازہ کے دوران فضا سوگوار رہی اور شرکاء نے مرحوم رہنما کو خراجِ عقیدت پیش کیا۔
بعد ازاں طلبہ تحریک کے رہنما شریف عثمان ہادی کو آہوں اور سسکیوں کے ساتھ سپردِ خاک کر دیا گیا۔ ان کی تدفین کے موقع پر سیکیورٹی کے سخت انتظامات کیے گئے تھے۔
واضح رہے کہ شریف عثمان ہادی کے قتل کے بعد بنگلادیش میں سیاسی اور سماجی فضا خاصی کشیدہ رہی، جبکہ ملک بھر میں ان کے حق میں مظاہرے اور احتجاج بھی دیکھنے میں آئے۔
