بھارتی میڈیا رپورٹ کے مطابق فلمی انداز میں متحدہ عرب امارات کی ریاست دبئی سے کروڑوں روپے مالیت کا سونا بھارت اسمگل کرنے والی 31 سالہ بھارتی اداکارہ رانیا راؤ پر 102 کروڑ روپے کا جرمانہ عائد کیا گیا ہے۔
ٹائمز آف انڈیا کے مطابق رانیا راؤ کو چار مارچ کو بنگلورو ایئرپورٹ سے ساڑھے 14 کلو سونا جو کہ بھارتی 13 کروڑ روپے کا بنتا ہے، اسمگل کرتے ہوئے گرفتار کیا گیا تھا۔
بھارتی میڈیا کا کہنا ہے کہ اداکارہ نے فلمی انداز میں کپڑوں اور جسم کے ساتھ سونے کے بسکٹس کو اس طرح چپکایا ہوا تھا کہ اسے تلاش کرنا مشکل تھا، تاہم ایئرپورٹ پر حکام نے انہیں بڑی ہوشیاری سے پکڑ لیا تھا جس کے بعد انہیں جیل بھیج دیا گیا تھا۔
اب ڈائریکٹوریٹ آف ریونیو انٹیلی جنس (ڈی آر آئی) نے سونے کی اسمگلنگ کیس کے سلسلے میں کنڑ فلم اداکارہ رانیا راؤ پر 102 کروڑ روپے کا جرمانہ عائد کیا ہے۔
اس کے علاوہ ہوٹل والے ترون کونداراجو پر 63 کروڑ روپے کا جرمانہ عائد کیا گیا، جب کہ زیورات والے ساحل سکاریا جین اور بھرت کمار جین پر 56 کروڑ روپے کا جرمانہ عائد کیا گیا۔
تفتیشی افسران رانیا راؤ سے کیسا برتاؤ کر رہے ہیں؟ اداکارہ کے سنگین الزامات
ڈی آر آئی حکام کا کہنا ہے کہ یہ جرمانے سونے کی اسمگلنگ کے ایک بڑے نیٹ ورک کی جاری تحقیقات کے حصے کے طور عائد کی گئی ہے۔
رانیا راؤ نے 2014 میں کنڑ زبان کی فلموں سے کیریئر کا آغاز کیا تھا اور بعد ازاں انہوں نے تامل فلموں میں بھی کام کیا اور ان کا شمار جنوبی بھارتی فلم انڈسٹری کی ابھرتی اداکاراؤں میں ہوتا ہے۔
رانیا راؤ نے چند بڑے بجٹ کی فلموں اور مقبول ہیروز کے ساتھ بھی مرکزی کردار ادا کیے، تاہم کچھ عرصے سے وہ فلم انڈسٹری سے دور تھیں اور چند ماہ قبل انہوں نے شادی کرلی تھی۔
رانیا راؤ کے تواتر سے دبئی اور بھارت کے دوروں کے بعد حکام کو ان پر شک ہوا اور ان کی کڑی نگرانی کرکے انہیں سونا اسمگل کرنے کرتے ہوئے گرفتار کیا گیا تھا۔
