منگوپیرکی ماربل فیکٹری کے مالک کو دس کروڑ روپے کی بھتے کی پرچی موصول

کراچی : منگوپیرکی ماربل فیکٹری کے مالک کو دس کروڑ روپے کی بھتے کی پرچی موصول ہوئی ، پرچی کے ساتھ دو گولیاں بھی بھیجی گئیں ہیں۔
تفصیلات کے مطابق کراچی میں بھتہ خور گروہ ایک بار پھر سرگرم ہے، صرف دو دن کے اندر بھتے کے دو سنگین واقعات رپورٹ ہوئے ہیں، جس کے باعث تاجر اور کاروباری طبقہ شدید پریشانی کا شکار ہیں۔
منگھوپیر میں بھتہ خوری کا ایک اورکیس سامنے آیا ، جہاں ماربل فیکٹری کے مالک سے دس کروڑ روپے بھتے کا مطالبہ کیا گیا۔
پولیس نے بتایا کہ متاثرہ تاجر کو پہلے نامعلوم نمبروں سے متعدد کالز اور میسجز موصول ہوئے، جن میں بھتے کا مطالبہ کیا جاتا رہا۔ چند روز بعد ایک پارسل موصول ہوا جس میں دو نائن ایم ایم گولیاں اور بھتے کی پرچی موجود تھی۔
تاجر کا کہنا ہے کہ بھتہ خوروں نے دھمکی دی کہ “پانچ دن کے اندر رقم کا انتظام کرو، ورنہ سنگین نتائج بھگتنا پڑیں گے” اور بھتہ خوروں نے خود کو گینگ وار گروپ سے منسلک بتایا۔
متاثرہ تاجر نے مزید بتایا کہ چند روز پارسل موصول ہوا،جس میں دو گولیاں اوردس کروڑ بھتے کا مطالبہ کیا گیا اور نہ دینے پر سنگین نتائج کی دھمکیاں دی گئی ہیں
پولیس نے واقعہ کا مقدمہ متاثرہ تاجر کی مدعیت میں درج کرتے ہوئے تحقیقات اسپیشل انویسٹیگیشن یونٹ کے سپرد کر دی ہیں۔
یاد رہے دو روز قبل نیو ایم اے جناح روڈ پر پیش آیا، جہاں ایک شوروم کے مالک سے پچاس لاکھ روپے بھتے کا مطالبہ کیا گیا تھا اور بھتہ نہ دینے پر نامعلوم ملزمان نے شوروم پر فائرنگ کی۔
تاجروں کا کہنا ہے کہ شہر میں بھتہ خوروں کی اچانک بڑھتی سرگرمیوں نے کاروباری طبقے کو شدید عدم تحفظ کا شکار کر دیا ہے، جبکہ پولیس نے دونوں واقعات کی تحقیقات تیز کرنے کی یقین دہانی کروائی ہے۔