کوہستان اسکینڈل :مرکزی ملزم کے ساتھی کے گھر سے سونا برآمد

پشاور: کوہستان اسکینڈل کے مرکزی ملزم کے ساتھی کے گھر سے 115 تولے سونا برآمد کرلیا گیا جبکہ اس کے بینک اکاؤنٹس میں ساڑھے 3 کروڑ روپے کی مشکوک ٹرانزیکشنز ریکارڈ کی گئی۔
تفصیلات کے مطابق نیب نے کوہستان اسکینڈل کیس میں بڑی کارروائی کرتے ہوئے مرکزی ملزم قیصر اقبال کے ساتھی بلال شاہ کے گھر پر چھاپہ مارا، جس دوران 115 تولے سونا برآمد کیا گیا۔
نیب ذرائع نے بتایا کہ ملزم بلال شاہ کے پاس ایبٹ آباد میں 6 کروڑ روپے مالیت کا ایک پلاٹ بھی موجود ہے، جبکہ اس کے بینک اکاؤنٹس میں ساڑھے 3 کروڑ روپے کی مشکوک ٹرانزیکشنز ریکارڈ کی گئی ہیں۔
ذرائع کا کہنا ہے کہ مذکورہ رقم مرکزی ملزم قیصر اقبال کی جانب سے بلال شاہ کے اکاؤنٹس میں منتقل کی گئی تھی۔
کوہستان اسکینڈل کی تحقیقات کے دوران نیب نے پولیس کے سب انسپکٹر نصیرالدین کو بھی گرفتار کرلیا ہے، جو مبینہ طور پر اس نیٹ ورک کا حصہ تھا۔
علاوہ ازیں، نیب نے مرکزی ملزم قیصر اقبال کا ایک اور قیمتی بنگلہ بھی سیل کر دیا ہے، جس کی مالیت تقریباً 6 کروڑ روپے بتائی گئی ہے، یہ بنگلہ ملزم نے اپنے بھائی کے نام پر خریدا تھا۔