گورنر سندھ سید محمد نہال ہاشمی نے قائداعظم فاؤنڈیشن ہیوسٹن کا دورہ کیا جہاں انہوں نے بانی پاکستان قائداعظم محمد علی جناح کی زندگی اور جدوجہد پر مبنی خصوصی ڈاکیومنٹری دیکھی۔ ڈاکیومنٹری میں قیامِ پاکستان کے تاریخی مراحل اور بابائے قوم کی قیادت کو مؤثر انداز میں پیش کیا گیا۔ اس موقع پر گورنر سندھ نے کہا کہ قائداعظمؒ کے سنہری اصول آج بھی قومی ترقی کے لیے رہنمائی فراہم کرتے ہیں اور نئی نسل کو ان کے افکار و وژن سے روشناس کرانا وقت کی اہم ضرورت ہے۔
دورے کے دوران فاؤنڈیشن کے بانی رکن نے گورنر سندھ کو فاؤنڈیشن کا بیج لگا کر خوش آمدید کہا۔ گورنر سندھ نے اوورسیز پاکستانیوں کی خدمات کو سراہتے ہوئے انہیں قومی تشخص کے سفیر قرار دیا اور کہا کہ بیرونِ ملک پاکستانی وطن کی مثبت تصویر اجاگر کرنے میں اہم کردار ادا کر رہے ہیں۔ ملاقات میں باہمی دلچسپی کے امور اور قائداعظمؒ کے پیغام کے فروغ پر بھی تبادلہ خیال کیا گیا۔ اس موقع پر فاؤنڈیشن کے بانی اراکین تنویر احمد، طاہر بھٹی اور ڈاکٹر آصف قدیر بھی موجود تھے۔
