کل سے بارشوں کی پیشگوئی، الرٹ جاری

پی ڈی ایم اے نے خیبرپختونخوا میں کل سے 19ستمبر تک بارشوں کی پیشگوئی کا الرٹ جاری کر دیا۔
پی ڈی ایم اے کے مطابق خیبرپختونخوا میں کل سے بارش اور آندھی کا امکان ہے جب کہ چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، صوابی، پشاور، کوہاٹ میں بھی بارش متوقع۔
پی ڈی ایم اے کا کہنا ہے کہ بارش سے نالوں اور دریا میں پانی کےبہاؤ میں اضافےکا خدشہ ہے۔ ایبٹ آباد، بٹگرام، مانسہرہ، سوات و دیگر پہاڑی علاقوں میں لینڈ سلائیڈنگ کا امکان۔
ترجمان نے کہا کہ کمزور مکانات، بجلی کے کھمبے، اشتہاری بورڈز اور سولرپینلز کو نقصان پہنچ سکتا ہے، عوام سے اپیل ہے خراب موسم کے دوران غیرضروری سفر سے اجتناب کریں۔
ادھر محکمہ موسمیات نے کہا ہے کہ آئندہ ہفتہ کے دوران ملک کے بالائی علاقوں میں اندھی اور گرج چمک کے ساتھ بارش کا امکان ہے۔
بحیرہ عرب سے درمیانی شدت کی مرطوب ہوائیں ملک کے بالائی علاقوں میں داخل ہورہی ہے، جس کے باعث خیبرپختونخوا میں 16 ستمبر سے 19 ستمبر کے درمیان مختلف شہروں میں وقفہ وقفہ سے بارش کا امکان ہے۔
محکمہ موسمیات کا کہنا ہے کہ 15 سے 19 ستمبر کے دوران کشمیر کے مختلف علاقوں میں بارش کا امکان ہے، 16 سے 19 ستمبر تک گلگت بلتستان کے مختلف علاقوں میں بارش برس سکتی ہے، اسلام اور پنجاب کے مختلف اضلاع میں 16 سے 19 ستمبر تک بارشوں کا امکان ہے۔
اس دوران سندھ کے بیشتر مقامات پر موسم گرم اور خشک جبکہ ساحلی اضلاع میں مطلع جزوی ابرآلود رہے گا، بلوچستان کے بیشتر علاقوں میں مطلع جزوی ابر آلود اور موسم مرطوب رہنے کا امکان ہے