انڈین کرکٹ ٹیم کے کپتان شبھمن گل اور پاکستانی مداح کی راہ چلتے ملاقات

آسٹریلیا میں بھارتی کرکٹ ٹیم کے کپتان شبھمن گل سے ایک مداح نے مصافحہ کرنے کے فوراً بعد بلند آواز میں ’پاکستان زندہ باد‘ کا نعرہ لگا دیا۔
آسٹریلیا کے شہر ایڈیلیڈ میں انڈین کرکٹ ٹیم کے کپتان شبھمن گل اور ایک پاکستانی مداح کی راہ چلتے ملاقات اور ’پاکستان زندہ باد‘ کا نعرہ لگنے کا معاملہ سوشل میڈیا پر موضوع بحث بنا ہوا ہے۔
سوشل میڈیا پر وائرل ہونے والی ویڈیو میں دیکھا جا سکتا ہے کہ حال ہی میں انڈیا کی ون ڈے ٹیم کے کپتان بننے والے شبھمن گل اور فاسٹ بولر ہرشت رانا شہر میں گھوم رہے ہیں اور اس دوران ایک نوجوان آگے بڑھ کر اُن سے مصافحہ کرتا ہے۔
سیاہ شرٹ، بلیو جینز اور چشمہ لگائے شبھمن گل مصافحے کے لیے اپنا ہاتھ آگے بڑھاتے ہیں اور اسی دوران نوجوان ’پاکستان زندہ باد‘ کا نعرہ لگاتا ہے جس پر شبھمن گل بظاہر حیران ہوتے ہیں لیکن بغیر کوئی ردِعمل دیے اپنا ہاتھ پیچھے کر کے آگے بڑھ جاتے
اس واقعے کی ویڈیو چند ہی گھنٹوں میں سوشل میڈیا پر وائرل ہو گئی، جہاں صارفین اسے ایشیا کپ میں بھارت کی جانب سے پاکستان کے کھلاڑیوں سے ہینڈ شیک سے انکار کرنے کا جواب اور  ریوینج موومنٹ کہہ رہے ہیں۔
کئی صارفین نے اسے مزاحیہ انداز میں پاکستانی فین کی چالاک جوابی کارروائی قرار دیا، جب کہ بعض بھارتی مداحوں نے اسے غیر اخلاقی حرکت کہا۔
واضح رہے کہ ایشیا کپ کے دوران بھارت اور پاکستان کے درمیان میچ کے بعد بھارتی کھلاڑیوں کی جانب سے پاکستانی پلیئرز سے ہاتھ نہ ملانے پر تنقید ہوئی تھی۔