غزہ: پٹی اسرائیل کے لیے کسی خطرے کا باعث نہیں بن سکتی؟

اسرائیلی وزیر اعظم نیتن یاہو کا کہنا ہے کہ اب غزہ کی پٹی اسرائیل کے لیے کسی خطرے کا باعث نہیں بن سکتی۔
غیر ملکی ذرائع ابلاغ کے مطابق اسرائیلی وزیر اعظم نیتن یاہو کا کہنا تھا کہ اسرائیل کا ہدف حماس کو غیر مسلح کرنا اور غزہ کو ایک غیر عسکری علاقے میں تبدیل کرنا ہے۔
انہوں نے کہا کہ تل ابیب واشنگٹن کے ساتھ مل کر ایک ایسے منصوبے پر کام کر رہا ہے جو ٹرمپ کے ساتھ طے پانے والے معاہدے کے مطابق غزہ کی صورت حال کو تبدیل کرے گا۔
اسرائیلی وزیر اعظم نے کہا کہ ہم مرحلہ وار غیر مسلح کرنے پر کام کر رہے ہیں اور اس منصوبے کے دیگر حصوں پر بھی بیک وقت پیش رفت ہو رہی ہے۔
اسرائیلی وزیر اعظم کا یہ بیان ایسے وقت میں آیا جب قطر کے وزیر اعظم شیخ محمد بن عبدالرحمن آل ثانی نے اعلان کیا کہ ان کا ملک حماس پر دباؤ ڈالنے کی کوشش کر رہا ہے تاکہ وہ اپنے اسلحے سے دست بردار ہونے کی ضرورت کو تسلیم کرے۔ انھوں نے کہا کہ یہ بات واضح ہے کہ حماس غزہ کی حکومت چھوڑنے پر آمادہ ہے۔
گزشتہ روز ان کا کہنا تھا کہ غزہ میں حالیہ واقعات قطر کے لیے انتہائی مایوس کن تھے۔ انھوں نے اسرائیلی فوجیوں پر حملے کو جنگ بندی کی خلاف ورزی قرار دیا۔