افغان شہری , پاکستان اوریجن کارڈ کا اجرا کیس، پشاور ہائیکورٹ کا فیصلہ معطل

اسلام آباد (30 اکتوبر 2025): سپریم کورٹ نے افغان شہری کو پاکستان اوریجن کارڈ (پی او سی) کے اجرا سے متعلق کیس کی سماعت کے دوران پشاور ہائیکورٹ کا فیصلہ معطل کر دیا۔
اے پی پی کے مطابق سپریم کورٹ میں افغان شہری کو پی او سی کے اجرا سے متعلق کیس کی سماعت جسٹس شاہد وحید کی سربراہی میں تین رکنی بینچ نے کی۔
دورانِ سماعت ایڈیشنل اٹارنی جنرل رانا اسد اللہ عدالت میں پیش ہوئے اور عدالت کو بتایا کہ یکم دسمبر 2023 کو پشاور ہائیکورٹ کے فیصلے کے خلاف وفاق نے اپیل دائر کر رکھی ہے۔
ایڈیشنل اٹارنی جنرل نے مؤقف اختیار کیا کہ پشاور ہائیکورٹ نے اپنے فیصلے میں قرار دیا تھا کہ اگر کوئی مرد افغان شہری پاکستانی خاتون سے شادی کرے تو اسے پاکستان اوریجن کارڈ (پی او سی) جاری کیا جائے۔
انہوں نے کہا کہ حکومت کو پی او سی کارڈ کے اجرا سے کوئی اعتراض نہیں تاہم ہائیکورٹ نے یہ بھی قرار دیا کہ ایسے افغان شہری کو پاکستانی شہریت دی جائے جو قانون کے مطابق ممکن نہیں۔
جسٹس مسرت ہلالی نے استفسار کیا کہ شہریت کن بنیادوں پر دی جا سکتی ہے اور کُل کتنے درخواست گزار ہیں؟ جس پر ایڈیشنل اٹارنی جنرل نے بتایا کہ مجموعی طور پر 117 درخواست گزار ہیں۔
جسٹس مسرت ہلالی نے ریمارکس دیے کہ یہ تو وہ درخواست گزار ہیں جو سامنے آئے ہیں۔
نادرا کے وکیل نے عدالت کو بتایا کہ پاکستانی خاتون سے شادی کرنے والے افغان شہری کیلیے ویلڈ (کار آمد) ویزا کی شرط بھی ضروری ہے۔
جسٹس مسرت ہلالی نے ریمارکس دیے کہ یہ دیکھنا چاہیے کہ کوئی شخص دیوار پھلانگ کر آیا یا دروازے سے داخل ہوا۔
ایڈیشنل اٹارنی جنرل نے مزید بتایا کہ پشاور ہائیکورٹ کے فیصلے کی روشنی میں اب توہینِ عدالت کی درخواستیں بھی دائر کی جا رہی ہیں۔
عدالتِ عظمیٰ نے پشاور ہائیکورٹ کا فیصلہ معطل کرتے ہوئے فریقین کو نوٹس جاری کر دیے اور کیس کی مزید سماعت ملتوی کر دی۔