سروائیکل کینسر سے بچاؤ کی ویکسینیشن مہم کی مدت میں توسیع کا فیصلہ

اسلام آباد (28 ستمبر 2025): ہدف حاصل نہ ہونے پر سروائیکل کینسر سے بچاؤ کی ویکسینیشن مہم کی مدت میں توسیع کا فیصلہ کر لیا گیا۔
ذرائع نے اے آر وائی نیوز کو بتایا کہ قومی انسداد سروائیکل کینسر ویکسینیشن مہم کی مدت میں توسیع کا فیصلہ ہدف حاصل نہ کیے جانے پر ہوا ہے، صوبوں نے انسداد ایچ پی وی مہم کی مدت میں توسیع کی اپیل کی ہے، پنجاب، سندھ، آزاد جموں و کشمیر، اسلام آباد میں مہم کی مدت میں توسیع کی جائے گی۔

ذرائع نے بتایا کہ سندھ حکومت نے مہم کی مدت تین دن بڑھانے کا فیصلہ کیا ہے جس کے مطابق مہم 30 ستمبر تک جاری رہے گی، صوبائی حکومت اس حوالے سے وفاق کو کل آگاہ کرے گی۔
ادھر، اسلام آباد میں ایچ پی وی مہم کی مدت تین سے سات دن تک بڑھانے پر غور کیا جا رہا ہے جبکہ پنجاب اور آزاد جموں و کشمیر میں بھی 3 تا 7 روز کی توسیع کا امکان ہے۔
ملکی تاریخ کی پہلی انسداد سروائیکل کینسر مہم 15 تا 27 ستمبر چلائی گئی جس کا ہدف 1 کروڑ 17 لاکھ سے زائد بچیوں کی ویکسینیشن ہے۔
9 سے 14 سال کی عمر کی لڑکیوں کو ویکسین لگوائی جائے یا نہیں؟
کورونا ویکیسن کے بعد اکثر لوگوں میں یہ ابہام پایا جاتا تھا کہ یہ ایک جان لیوا ویکسین ہے اسی تناظر میں والدین اس ویکسین کو بھی اپنے بچوں کو لگوانے سے انکار کر رہے ہیں۔

دوسری جانب محکمہ صحت کی جانب سے جاری سرکلر میں بھی اس ویکسین کے بڑے فوائد بتائے جا رہے ہیں۔
مستقبل قریب میں خواتین کو کینسر جیسے مرض سے بچاؤ کیلیے قومی سطح پر ویکسینیشن کا عمل شروع کیا گیا جبکہ 148 ممالک جس میں اسلامی ممالک بھی شامل ہیں کامیابی سے یہ ویکسین استعمال کی گئی لیکن آزاد جموں و کشمیر کے اندر اس ویکسین کو لگانے پر والدین نے مکمل انکار کر رکھا ہے۔