پاکستان کی جانب سے بھارتی فضائیہ کی خاتون پائلٹ شیوَانگی سنگھ کی گرفتاری کا جھوٹ بے نقاب ہوگیا ، بھارتی صدر کے ساتھ شیوانگی سنگھ کی تصاویر نشر کرتے ہوئے جھوٹا تاثر دیا گیا۔
تفصیلات کے مطابق پاکستان دشمنی میں مبتلا بھارتی میڈیا کی ایک اور جھوٹی پروپیگنڈا سازش بےنقاب ہوگئی۔
وزارتِ اطلاعات و نشریات پاکستان نے بتایا تھا کہ بھارتی نیوز چینل ریپبلک ٹی وی نے جھوٹا دعویٰ کیا کہ پاکستان نے بھارتی فضائیہ کی خاتون پائلٹ شیوانگی سنگھ کو گرفتار کرلیا ہے۔
ریپبلک ٹی وی نے اپنی رپورٹ میں بھارتی صدر کے ساتھ شیوانگی سنگھ کی تصاویر نشر کرتے ہوئے یہ تاثر دیا کہ پاکستان نے انہیں تحویل میں لے لیا ہے۔ تاہم وزارتِ اطلاعات پاکستان نے واضح کیا ہے کہ پاکستان نے آپریشن “بنیانِ مرصوص” کے دوران کسی بھارتی پائلٹ کی گرفتاری کا کوئی دعویٰ نہیں کیا۔
ترجمان وزارتِ اطلاعات نے بتایا کہ 7 مئی کے بعد سے بھارت کو کسی بھی پائلٹ کی حوالگی نہیں کی گئی، جبکہ ڈی جی آئی ایس پی آر نے 11 مئی کی پریس کانفرنس میں دوٹوک الفاظ میں کہا تھا کہ پاکستان کی تحویل میں کوئی بھارتی پائلٹ موجود نہیں۔
وزارتِ اطلاعات کا کہنا ہے کہ بھارتی میڈیا اور حکومت جھوٹے بیانیے کے ذریعے اپنی ناکامیوں پر پردہ ڈالنے کی کوشش کر رہے ہیں، بھارتی میڈیا کی جھوٹی، من گھڑت اور مضحکہ خیز رپورٹس نے ایک بار پھر بھارت کی جگ ہنسائی کرائی ہے۔
ترجمان نے مزید کہا کہ بھارتی حکومت اور گودی میڈیا نے اپنی ہی صدر کو جھوٹے بیانیے کا حصہ بنا کر شرمناک حدیں پار کر دی ہیں ، پاکستان نے ہمیشہ حقائق پر مبنی موقف اپنایا ہے اور ایسی بے بنیاد خبروں کی سختی سے تردید کی ہے۔
