9 اور 10 ستمبر کو خیبر پختونخوا کے مختلف علاقوں میں تین علیحدہ جھڑپوں کے دوران بھارتی آلہ کار فتنہ الخوارج کے 19 دہشت گرد واصل جہنم کر دیے گئے۔
خوارج کی موجودگی کی اطلاع پر سیکیورٹی فورسز نے ضلع مہمند کے عمومی علاقے گلونو میں انٹیلی جنس کی بنیاد پر آپریشن کیا۔ دورانِ آپریشن، اپنی افواج نے خوارج کے ٹھکانے کو مؤثر انداز میں نشانہ بنایا اور شدید فائرنگ کے تبادلے کے بعد بھارتی سرپرستی میں سرگرم 14 خوارج واصل جہنم ہوئے۔
اسی طرح شمالی وزیرستان کے علاقے دتہ خیل میں بھی ایک اور انٹیلی جنس کی بنیاد پر آپریشن کیا گیا جہاں فائرنگ کے تبادلے میں مزید 4 خوارج کو سیکیورٹی فورسز نے انجام تک پہنچا دیا۔
ضلع بنوں میں ہونے والے ایک اور مقابلے میں ایک مزید خوارج کو سیکیورٹی فورسز نے واصل جہنم کیا۔
بھارتی سرپرستی میں سرگرم ہلاک شدہ خوارج سے اسلحہ اور گولہ بارود بھی برآمد ہوا، جو ان علاقوں میں متعدد دہشت گردانہ کارروائیوں میں ملوث رہے تھے۔
علاقے میں مزید خوارج کی تلاش اور خاتمے کے لیے کلیئرنس آپریشن جاری ہیں، کیونکہ پاکستان کی سیکیورٹی فورسز ملک سے بھارتی سرپرست دہشت گردی کے ناسور کو جڑ سے اکھاڑ پھینکنے کے لیے پرعزم ہیں
