بھارت کے دہلی میں ایک بار پھر متعدد اسکولوں کو ای میل کے ذریعے اطلاع دی گئی ہے کہ اسکولوں میں دھماکہ خیز مواد نصب کردیا گیا ہے۔
بھارتی میڈیا رپورٹس کے مطابق دھمکی ملنے والے اسکولوں میں دہلی پبلک اسکول (ڈی پی ایس) دوارکا، سروودیہ سینئر سیکنڈری اسکول، قطب مینار اور نجف گڑھ میں واقع کرشنا ماڈل پبلک اسکول شامل ہیں۔ انتظامیہ نے تمام اسکولوں کو خالی کرا دیا ہے۔
رپورٹس کے مطابق صبح کے وقت جب بچے اور اساتذہ اسکول پہنچ چکے تھے، تو اچانک بم کی دھمکی ملنے کے بعد کھلبلی مچ گئی، اسکول مینجمنٹ نے طلبہ کو فوری طور پر محفوظ جگہ پر منتقل کیا اور پولیس کو اطلاع دی۔
دہلی پولیس، بم اسکواڈ اور فائر بریگیڈ کی ٹیمیں متعلقہ مقامات پر پہنچ گئیں اور پورے احاطے کی تلاشی لی گئی، تاہم کسی بھی طرح کا مشتبہ مواد یا سامان نہیں ملا۔
واضح رہے کہ یہ پہلا موقع نہیں ہے جب دہلی کے اسکولوں کو اس نوعیت کی دھمکیاں ملی ہیں۔ گزشتہ کئی مہینوں سے وقفے وقفے سے تعلیمی اداروں کو ای میل یا فون کے ذریعے بم کی دھمکیاں دی جاتی ہیں۔
سائبر سیل ان ای میلز کے پیچھے کارفرما عناصر کا سراغ لگانے کی کوشش کررہا ہے، حکام کا کہنا ہے کہ ای میل کے ذریعے ملنے والی دھمکیوں کا تعلق اکثر بیرونِ ملک سے جڑے سرورز سے ہوتا ہے، جس کی وجہ سے تفتیش میں وقت لگ رہا ہے۔
پولیس کا کہنا ہے کہ معاملے کی گہرائی سے تحقیقات شروع کردی گئی ہیں، اور دھمکی دینے والوں کے خلاف سخت قانونی کارروائی کی جائے گی.
