اسلام آباد: وزیرِاعظم شہباز شریف نے سابق وزیرِاعظم شہید محترمہ بینظیر بھٹو کے یومِ شہادت کے موقع پر انہیں خراجِ عقیدت پیش کرتے ہوئے کہا ہے کہ بینظیر بھٹو نے پاکستان کو ایک پُرامن، ترقی پسند اور جمہوری ریاست بنانے کے لیے قابلِ قدر اقدامات کیے۔
اپنے پیغام میں وزیرِاعظم شہباز شریف نے کہا کہ آج پوری قوم پاکستان کی عظیم بیٹی، سابق وزیرِاعظم شہید محترمہ بینظیر بھٹو کی برسی منا رہی ہے۔ انہوں نے کہا کہ بینظیر بھٹو نے جمہوریت، عوامی حقوق اور وفاقِ پاکستان کے استحکام کے لیے بے مثال جدوجہد کی۔
وزیرِاعظم کا کہنا تھا کہ شہید محترمہ بینظیر بھٹو نے جمہوری عمل میں رواداری، برداشت اور ہم آہنگی جیسی مثبت اقدار کو فروغ دیا، جو ان کی سیاسی بصیرت اور بالغ نظری کا واضح ثبوت ہے۔ انہوں نے سیاسی اختلاف کے باوجود مکالمے اور برداشت کی روایت کو آگے بڑھایا۔
شہباز شریف نے مزید کہا کہ ملک و قوم کے لیے شہید محترمہ بینظیر بھٹو کی خدمات کو ہمیشہ یاد رکھا جائے گا اور ان کی جدوجہد آنے والی نسلوں کے لیے مشعلِ راہ ہے۔
