بالائی علاقوں میں شدید سردی، برف باری سے سڑکیں بند

ملک کے بالائی علاقوں میں بارش اور شدید برف باری کے بعد سردی کی شدت میں نمایاں اضافہ ہوگیا ہے، بلوچستان کے بالائی اضلاع چمن، قلعہ عبداللّٰہ، زیارت اور پاک افغان سرحدی علاقوں میں موسم کی خرابی کے باعث نظامِ زندگی مفلوج ہوکر رہ گیا جبکہ متعدد سڑکیں بند ہونے سے زمینی رابطے منقطع ہیں، ادھر استور میں برف باری کے باعث بند رابطہ سڑکیں تاحال بحال نہ ہوسکیں، تاہم سوات کے بالائی علاقوں میں متاثرہ سڑکوں کی بحالی کا کام جاری ہے۔