عام شہری کی زمین کے تحفظ کیلیے نیا قانون نافذ

لاہور (31 اکتوبر 2025): پنجاب میں عام شہری کی زمین کے تحفظ کیلیے نیا قانون نافذ، پنجاب پروٹیکشن آف اونرشپ ایم موایبل پراپرٹی آرڈیننس 2025 کی منظوری دے دی گئی۔
وزیر اعلیٰ پنجاب مریم نواز کی زیرِ صدارت اجلاس ہوا جس میں قبضہ مافیا سے نمٹنے کیلیے ڈسپیوٹ ریزولیشن کمیٹیوں کے قیام کا فیصلہ کیا گیا، عدالتوں میں برسوں سے زیرِ التوا مقدمات صرف 90 دن میں نمٹائے جائیں گے۔
ڈسپیوٹ ریزولیشن کمیٹی کے فیصلے کے خلاف اپیل ہائیکورٹ کے ریٹائرڈ جج کی سربراہی میں خصوصی ٹریبونل سنے گا جو اپیل کا فیصلہ 90 دن کے اندر کرنے کا پابند ہوگا۔
اجلاس میں وزیر اعلیٰ مریم نواز نے کہا کہ اب پنجاب میں کسی کی زمین کوئی نہیں چھین سکے گا ریاست ماں کی طرح ہر کمزور کے ساتھ کھڑی ہے۔
پنجاب کے ہر ضلع میں 6 رکنی ضلعی ڈسپیوٹ ریزولیشن کمیٹی قائم ہوگی جس کے کنوینر ڈپٹی کمشنر ہوں گے۔ کمیٹی میں ڈی پی او اور دیگر ضلعی افسران بھی شامل ہوں گے، کمیٹیوں کو 30 دن کے اندر فنکشنل کرنے کا ہدف مقرر ہے۔
قبضہ کیس کے فیصلے کے بعد 24 گھنٹے کے اندر زمین واگزار کروائی جائے گی، قبضہ مافیا سے زمین چھڑانے کیلیے پیرا فورس کی خدمات حاصل کرنے کی تجویز پر غور کیا گیا۔