امریکی ریاست ٹیکساس میں ایک چھوٹا نجی طیارہ حادثے کا شکار ہو کر ہائی وے پر گر کر تباہ ہو گیا، جس کے نتیجے میں ایک شخص ہلاک ہو گیا جبکہ دیگر افراد کے بارے میں تفصیلات سامنے آ رہی ہیں۔
امریکی میڈیا رپورٹس کے مطابق طیارہ ٹیکساس کی فضائی حدود میں داخل ہونے کے فوراً بعد حادثے کا شکار ہوا۔ طیارے میں مجموعی طور پر 6 افراد سوار تھے۔ واقعے کے بعد امدادی ٹیمیں فوری طور پر جائے حادثہ پر پہنچ گئیں جبکہ متعلقہ حکام نے تحقیقات کا آغاز کر دیا ہے۔
یہ حادثہ ایسے وقت میں پیش آیا ہے جب حالیہ دنوں میں امریکا میں فضائی حادثات کے متعدد واقعات رپورٹ ہوئے ہیں۔ اس سے قبل ریاست میسوری کے علاقے بٹلر میں ہوائی اڈے کے قریب ایک طیارہ گرنے سے اس میں سوار تمام 12 افراد ہلاک ہو گئے تھے۔ ہلاک ہونے والوں میں 11 اسکائی ڈائیورز اور ایک پائلٹ شامل تھا۔
دوسری جانب امریکی میرین کور کا ایک ایف اے 18 ہارنیٹ جنگی طیارہ بھی واشنگٹن میں معمول کی تربیتی پرواز کے دوران پہاڑی علاقے میں حادثے کا شکار ہوا تھا۔ تاہم اس واقعے میں پائلٹ نے بروقت ایجیکٹ کر کے اپنی جان بچا لی تھی اور معمولی زخمی ہونے پر اسے اسپتال منتقل کیا گیا تھا۔
امریکی حکام کے مطابق تمام حالیہ فضائی حادثات کی وجوہات جاننے کے لیے تحقیقات جاری ہیں۔
