اسلام آباد: وفاقی وزیر خزانہ سینیٹر محمد اورنگزیب نے کہا ہے کہ حکومت گزشتہ تین ہفتوں سے پیٹرولیم مصنوعات کی قیمتوں میں کمی کر رہی ہے اور اگر یہ رجحان برقرار رہا تو اس کے مثبت اثرات معیشت اور عوام دونوں پر مرتب ہوں گے۔
جیو نیوز کے پروگرام ’’کیپٹل ٹاک‘‘ میں گفتگو کرتے ہوئے وزیر خزانہ نے کہا کہ حکومت نے ملک میں پیٹرولیم مصنوعات کی قلت پیدا نہیں ہونے دی اور توانائی کی فراہمی کو یقینی بنایا گیا۔
محمد اورنگزیب کا کہنا تھا کہ پیٹرولیم مصنوعات کی قیمتوں میں کمی سے مہنگائی میں مزید کمی اور معاشی سرگرمیوں میں بہتری کی توقع ہے۔
انہوں نے بجٹ کے حوالے سے گفتگو کرتے ہوئے کہا کہ پاکستان پیپلز پارٹی کے ساتھ بجٹ کے خدوخال پر تفصیلی بات چیت ہوئی ہے اور ان کے تحفظات کوئی بڑا مسئلہ نہیں بنیں گے۔ ان کا کہنا تھا کہ حکومت اتحادی جماعتوں کے ساتھ مشاورت کے عمل کو جاری رکھے ہوئے ہے۔
وزیر خزانہ نے امید ظاہر کی کہ بجٹ سے متعلق معاملات افہام و تفہیم سے حل ہو جائیں گے اور حکومت معاشی استحکام کے سفر کو مزید آگے بڑھائے گی۔
