وزیراعظم شہباز شریف نے بجلی کی تقسیم کار کمپنیوں (ڈسکوز) کی نجکاری کے عمل کو تیز کرنے کی ہدایت دیتے ہوئے کہا ہے کہ خسارے میں چلنے والے سرکاری اداروں کی نجکاری حکومت کی اولین ترجیحات میں شامل ہے۔ انہوں نے اس بات پر زور دیا کہ نجکاری کا تمام عمل مکمل شفافیت کے ساتھ انجام دیا جائے۔
ڈسکوز کی نجکاری سے متعلق جائزہ اجلاس کی صدارت کرتے ہوئے وزیراعظم نے ہدایت کی کہ نجکاری کے بعد بجلی کے شعبے کے لیے ایک مؤثر اور مضبوط ریگولیٹری نظام تشکیل دیا جائے۔ اجلاس کو بتایا گیا کہ پہلے مرحلے میں اسلام آباد الیکٹرک سپلائی کمپنی (آئیسکو)، گوجرانوالا الیکٹرک پاور کمپنی (گیپکو) اور فیصل آباد الیکٹرک سپلائی کمپنی (فیسکو) کی نجکاری کی جائے گی۔
بریفنگ میں مزید آگاہ کیا گیا کہ ان تینوں کمپنیوں کی نجکاری کے لیے اظہارِ دلچسپی کے اشتہارات ملکی و بین الاقوامی اخبارات میں شائع کیے جا چکے ہیں، جبکہ کابینہ کی نجکاری کمیٹی متعلقہ ٹرانزیکشن اسٹرکچر کی منظوری بھی دے چکی ہے۔ سرمایہ کاروں کو متوجہ کرنے کے لیے رواں ماہ روڈ شوز کا انعقاد کیا جا رہا ہے، جن میں سعودی عرب، ترکیہ اور چین کے سرمایہ کاروں کو بھی مدعو کیا جائے گا۔
