امریکی صدارتی محل وائٹ ہاؤس نے ٹک ٹاک پر باضابطہ اکاؤنٹ بنالیا، تاکہ اس کے ذریعے 17 کروڑ سے زیادہ امریکی صارفین تک صدر ڈونلڈ ٹرمپ کے پیغامات پہنچائے جاسکیں۔
ایک ابتدائی وڈیو کے ساتھ نیا اکاؤنٹ شروع کیا گیا، جس میں ٹرمپ یہ کہتے نظر آتے ہیں “میں آپ کی آواز ہوں”۔ اس کے ساتھ تحریر تھا ’’امریکا، ہم واپس آگئے ہیں! ہیلو ٹک ٹاک!”۔
وائٹ ہاؤس کی ترجمان کیرولین لیویٹ نے کہا کہ ٹرمپ انتظامیہ عوام کی زیادہ سے زیادہ تعداد تک صدر کی تاریخی کامیابیوں کو پہنچانے کیلئے پُرعزم ہے اور ہم ایسے طریقے سے رابطہ قائم کررہے ہیں جو کسی سابقہ انتظامیہ نے نہیں اپنایا۔رہنما نیوز کی اطلاعات کےمطابق کانگریس کے بعض اراکین کو خدشہ ہے کہ امریکی صارفین کا ڈیٹا چینی حکومت تک پہنچ سکتا ہے جبکہ ٹرمپ اس ایپ کو امریکی سرمایہ کاروں کو فروخت کرنے کے ایک معاہدے پر کام کررہے ہیں۔
اس سے قبل امریکی انٹیلیجنس رپورٹوں میں کہا گیا تھا کہ اس ایپ کے مالکان چینی حکومت سے جڑے ہوئے ہیں اور اسے امریکی عوام پر اثر انداز ہونے کیلئے استعمال کیا جاسکتا ہے۔
ٹرمپ اس مشہور ایپ کے مداح ہیں اور نومبر 2024ء کے صدارتی انتخابات میں نوجوان ووٹروں کی حمایت حاصل کرنے کا سہرا اس ایپ کے سر قرار دیتے ہیں، جس کی بدولت انہوں نے ڈیموکریٹ امیدوار کمالا ہیرس کو شکست دی۔
