قومی کرکٹ ٹیم کے کپتان سلمان علی آغا پاکستان کے نوجوان وکٹ کیپر بیٹر محمد حارث کی حمایت میں سامنے آگئے

قومی کرکٹ ٹیم کے کپتان سلمان علی آغا پاکستان کے نوجوان وکٹ کیپر بیٹر محمد حارث کی حمایت میں سامنے آگئے۔
پاکستان ٹی ٹوئنٹی انٹرنیشنل ٹیم کے کپتان سلمان علی آغا حالیہ میچوں میں بیٹنگ میں ناکامی کا سامنا کرنے والے نوجوان وکٹ کیپر بیٹر محمد حارث کی حمایت کرتے ہوئے ان کی تعریف کی ہے۔
میڈیا سے گفتگو کرتے ہوئے آغا نے حارث سے متعلق گفتگو میں کہا کہ محمد حارث ٹاپ آرڈر بیٹر ہونے کے باوجود مڈل آرڈر میں کھیلا انہوں نے پاکستان ٹیم کیلئے اپنا نمبر قربان کیا، بہت کم لوگ ایسا کرتے ہیں۔
سلمان آغا نے کہا کہ وہ پاکستان کے لیے نمبر 6 یا 7 پر بیٹنگ کر رہے ہیں، لوگ یہ نہیں دیکھتے، لوگ بس یہ دیکھتے ہیں کہ وہ کارکردگی نہیں دکھا رہے، لیکن ان کی قربانی کو کوئی نہیں دیکھ رہا، وہ ایک ٹاپ آرڈر بیٹر ہیں، لیکن بغیر کسی شکایت کے انہیں جہاں بھیجا جاتا ہے، وہ اپنی بہترین پرفارمنس دیتے ہیں۔
پاکستان ٹیم کے کپتان سلمان آغا نے کہا کہ مجھے حارث پر پورا اعتماد ہے اور میں پُرامید ہوں وہ ایشیا کپ میں پرفارم کرے گا، ایسے پلیئر کو آپ ایک دو سیریز کی پرفارمنس پر باہر نہیں کرسکتے۔
واضح رہے کہ محمد حارث کی بیٹنگ میں مشکلات ان کے آخری 11 ٹی ٹوئنٹی انٹرنیشنل اننگز میں واضح ہیں، جن میں انہوں نے صرف 54 رنز بنائے ہیں۔
ان کی حالیہ اسکورز میں جولائی میں بنگلہ دیش کے خلاف 4، 0، اور 5، اگست میں ویسٹ انڈیز کے خلاف 6، 4، اور 2، اور یو اے ای اور افغانستان کے خلاف جاری سہ فریقی سیریز میں 15، 1، 1، اور 14 شامل ہیں، سہ فریقی سیریز کے فائنل میں انہوں نے نمبر چھ پر بیٹنگ کی اور تین گیندوں پر صرف دو رنز بنائے