راولپنڈی (10 ستمبر 2025): علیمہ خانم کی میڈیا ٹاک کے دوران تشدد کا شکار ہونے والے دونوں صحافیوں نے صلح کیلیے رضا مندی ظاہر کر دی۔
چیئرمین پی ٹی آئی بیرسٹر گوہر نے اڈیالہ جیل آمد کے موقع پر صحافیوں سے تشدد کے معاملے پر معذرت کی۔ انہوں نے کہا کہ جو ہوا وہ نہیں ہونا چاہیے تھا مجھے اس کا افسوس ہے۔
بیرسٹر گوہر نے تشدد کا نشانہ بننے والے دو صحافیوں کو گلے لگا لیا۔ چیئرمین پی ٹی آئی نے کہا کہ علیمہ خانم بہنوں کے ساتھ اپنے بھائی عمران خان کیلیے آتی ہیں ان کا سیاسی ایجنڈا نہیں، ایسا واقعہ ہونا ہی نہیں چاہیے تھا مار پیٹ اور تشدد ہمارا منشور ہی نہیں۔
انہوں نے کہا کہ ہم نے کارکنوں کو ہمیشہ پُرامن رہنے کی تلقین کی ہے، میں معذرت کرتا ہوں اور اس واقعے کی مذمت بھی کرتا ہوں۔
چیئرمین پی ٹی آئی کی معذرت کے بعد دونوں صحافیوں نے صلح کیلیے رضا مندی ظاہر کی۔
بیرسٹر گوہر نے میڈیا سے گفتگو میں کہا کہ وزیر اعلیٰ خیبر پختونخوا علی امین گنڈاپور کا 3 سال سے پاسپورٹ بلاک ہے وہ افغانستان کیسے جا سکتے ہیں؟
انہوں نے کہا کہ کے پی میں سیلاب نے بہت تباہی مچائی اور جانی نقصان بہت زیادہ ہوا، زراعت بری طرح متاثر ہے اور اب بھی سیلاب میں بہہ جانے والے لوگ لاپتا ہیں، وفاقی حکومت کو بڑے پن کا مظاہرہ کرنا چاہیے سیلاب متاثرین کی کھل کر مدد کریں۔
ان کا مزید کہنا تھا کہ میں نے جاں بحق ہونے والے 2 بھائیوں کے لواحقین کو 5 لاکھ دیے، متاثرہ لواحقین نے یہ رقم علاقے میں متاثرین کیلیے وقف کر دی، یہاں لوگوں کا جذبہ بھی ہے حکومت بھی کام کر رہی ہے۔
