کراچی: وزیراعلیٰ سندھ سید مراد علی شاہ کی زیر صدارت صوبائی کابینہ کا اہم بجٹ اجلاس منعقد ہوا، جس میں صوبائی وزراء، معاونینِ خصوصی، مشیران، چیف سیکریٹری، مختلف محکموں کے سیکریٹریز اور دیگر متعلقہ افسران نے شرکت کی۔
اجلاس کے دوران مالی سال 2025-26 میں ریکارڈ ترقیاتی منصوبوں کی تکمیل اور پیش رفت پر وزیراعلیٰ سندھ کی کاوشوں کو سراہا گیا۔ شرکاء نے صوبے میں جاری ترقیاتی عمل اور عوامی فلاحی منصوبوں پر اطمینان کا اظہار کیا۔
اس موقع پر وزیراعلیٰ سندھ مراد علی شاہ نے کہا کہ پاکستان پیپلز پارٹی کی قیادت کی رہنمائی میں عوامی خدمت کا سفر جاری رکھا جائے گا اور نئے مالی سال میں سندھ کے عوام کی فلاح و بہبود کے لیے مزید اقدامات کیے جائیں گے۔
کابینہ نے مالی سال 2026-27 کے صوبائی بجٹ کی منظوری دے دی۔ وزیراعلیٰ سندھ کا کہنا تھا کہ بجٹ کی تیاری میں معاشرے کے ہر طبقے کی ضروریات کو مدنظر رکھا گیا ہے تاکہ عوام کو زیادہ سے زیادہ ریلیف فراہم کیا جا سکے۔
انہوں نے بتایا کہ چیئرمین پاکستان پیپلز پارٹی بلاول بھٹو زرداری کی ہدایات کے مطابق غربت کے خاتمے کے لیے خصوصی اقدامات بجٹ کا حصہ بنائے گئے ہیں، جبکہ محنت کش طبقے کے لیے کم از کم اجرت سے متعلق اہم فیصلہ بھی نئے بجٹ میں شامل کیا گیا ہے۔
