اداکارہ و ماڈل حبا علی نے ایک حالیہ انٹرویو میں میاں بیوی کے رشتے میں بڑھتے ہوئے تناؤ کی بڑی وجہ سوشل میڈیا اور غیر ضروری موازنہ کو قرار دیا ہے۔
حبا علی کا کہنا تھا کہ بہت سی خواتین دوسروں کی زندگیوں کو دیکھ کر جلن اور حسد کا شکار ہو جاتی ہیں، جو ان کے اپنے گھر کے سکون کو متاثر کرتا ہے۔ انہوں نے کہا، “خواتین اکثر سوشل میڈیا پر دوسروں کی خوشگوار زندگی دیکھ کر غیر حقیقی توقعات باندھ لیتی ہیں، جو بعد میں ان کے اپنے رشتوں میں دراڑیں ڈال دیتی ہیں۔”
انہوں نے اپنی ایک قریبی دوست کی مثال دیتے ہوئے بتایا کہ اُس کے شوہر نے شکایت کی، “میری بیوی ہر وقت کہتی ہے کہ فلاں کو شوہر نے نئی گاڑی دی، فلاں کو مہنگا ڈریس ملا، مجھے کیوں نہیں؟” حبا کے مطابق اس قسم کا رویہ اکثر رشتوں میں تلخی پیدا کر دیتا ہے۔
اداکارہ نے خواتین کو مشورہ دیا کہ ہر شخص اور ہر گھر کے معاشی حالات، سوچ اور ضروریات مختلف ہوتی ہیں، اس لیے دوسروں سے اپنا موازنہ کرنا نہ صرف بے فائدہ بلکہ نقصان دہ بھی ہو سکتا ہے۔
انہوں نے مزید کہا کہ وہ محبت پر یقین رکھتی ہیں اور دوسری شادی سے کبھی انکار نہیں کیا، کیونکہ ہر رشتہ ایک نیا تجربہ ہوتا ہے۔
