وزیرِ دفاع خواجہ آصف نے قومی اسمبلی اجلاس کے دوران کہا ہے کہ ایران اور امریکا کے درمیان معاہدے پر جمعے کے روز دستخط متوقع ہیں۔ انہوں نے کہا کہ اگر تاریخ میں اسی نوعیت کا تعاون پنڈی اور اسلام آباد میں بھی ہوتا تو ملک کئی اہم سنگ میل عبور کر چکا ہوتا۔
خواجہ آصف کے مطابق پاکستان نے تحمل، بردباری اور دانشمندی سے امن کے قیام میں مثبت کردار ادا کیا، جبکہ وزیرِ اعظم اور فیلڈ مارشل نے امن عمل کو کامیاب بنانے کے لیے دن رات کام کیا۔ انہوں نے ایران اور امریکا کے درمیان معاہدے پر ایرانی قوم اور قیادت کو مبارکباد دیتے ہوئے کہا کہ ایرانی قیادت نے دباؤ کے باوجود بہادری اور اتحاد کے ساتھ قوم کی رہنمائی کی۔
