پاکستان کی معروف اداکارہ اسما عباس کا واٹس ایپ اکاؤنٹ ہیک ہو گیا، جس کی خبر ان کی بہن، لیجنڈ اداکارہ بشریٰ انصاری نے دی۔
بشریٰ انصاری نے انسٹاگرام پر ایک چیٹ کا اسکرین شاٹ شیئر کیا اور بتایا کہ اسما کا واٹس ایپ ہیک ہوگیا ہے۔
سینئر اداکارہ نے لکھا کہ ‘برائے مہربانی اس قسم کے پیغامات پر بھروسہ نہ کریں’۔
بشریٰ انصاری کی جانب سے شیئر کیے جانے والے اسکرین شاٹ میں ہیکر اسما عباس کا نام لے کر ابراہیم نامی شخص سے 10 لاکھ روپے ادھار کے طور پر مانگ رہا ہے۔
اس کے علاوہ اسما عباس نے بھی انسٹاگرام پر ویڈیو شیئر کی اور بتایا کہ میرے نمبر سے بہت سے لوگوں کو پیغامات بھیج کر پیسوں کا مطالبہ کیا جارہا ہے لہٰذا اس قسم کے میسجز پر دھیان نہ دیں۔
انہوں نے بتایا کہ یہ واردات بہت عام ہوتی جا رہی ہے، اور اس وجہ سے ان کے دوستوں اور عزیزوں کو مشکلات کا سامنا کرنا پڑ رہا ہے,جس کے لیے میں معذرت خواہ ہوں۔
واٹس ایپ کیسے ہیک ہوا؟
اسما عباس نے واقعے کی تفصیل کچھ اس طرح بیان کی: ایک فون کال کے دوران خدشہ پیدا کیا گیا کہ ان کا پارسل آیا ہے اور واٹس ایپ پر ایک کوڈ بھیجا گیا ہوگا، جو انہیں بھیج دیں۔
میری بیٹی زارا نے کئی دن سے کچھ بھیجا ہوا تھا، مجھے لگا بارشوں کی وجہ سے وہ پارسل تاخیر سے اب پہنچا ہے اسی لیے میں نے کوڈ بتا دیا۔
تاہم، یہ ردعمل واٹس ایپ کے ہیک ہونے کا باعث بن گیا
انہوں نے مزید کہا کہ پاکستان بھر میں اس جیسی وارداتیں عام ہوتی جا رہی ہیں, ایک مخصوص کوڈ بھیجنے تک ہی اکاؤنٹ کا کنٹرول ہیکرز کو منتقل ہو سکتا ہے
