وزیراعظم محمد شہباز شریف نے گروپ کیپٹن عاصم طارق کی شہادت پر گہرے دکھ اور افسوس کا اظہار کرتے ہوئے شہید کی بہادری اور فرض شناسی کو زبردست خراجِ عقیدت پیش کیا ہے۔
اپنے تعزیتی بیان میں وزیراعظم نے کہا کہ گروپ کیپٹن عاصم طارق نے ایک خاتون کی جان اور عزت کے تحفظ کے لیے اپنی جان کا نذرانہ پیش کیا اور غیر معمولی جرأت، بہادری اور فرض کی ادائیگی کی روشن مثال قائم کی۔
انہوں نے کہا کہ قوم اپنے ایسے بہادر سپوتوں کی قربانیوں کو ہمیشہ عزت و احترام کی نگاہ سے دیکھتی ہے اور ان کی خدمات کو کبھی فراموش نہیں کرے گی۔
وزیراعظم نے شہید کے اہلِ خانہ سے دلی ہمدردی اور تعزیت کا اظہار کرتے ہوئے کہا کہ پوری قوم اس دکھ کی گھڑی میں لواحقین کے ساتھ کھڑی ہے۔ انہوں نے دعا کی کہ اللہ تعالیٰ شہید کے درجات بلند فرمائے، انہیں اپنی رحمت میں اعلیٰ مقام عطا کرے اور اہلِ خانہ کو صبر و استقامت عطا فرمائے۔
شہباز شریف نے متعلقہ حکام کو ہدایت کی کہ واقعے کی مکمل، شفاف اور غیر جانبدارانہ تحقیقات کی جائیں اور ذمہ دار عناصر کو قانون کے مطابق سخت ترین سزا دی جائے۔
