کراچی میں شاہ لطیف ٹاؤن پولیس نے خفیہ اطلاع پر کارروائی کرتے ہوئے منشیات اسمگلنگ کی بڑی کوشش ناکام بنا دی۔ پولیس کے مطابق پشاور سے لائی گئی منشیات کو رکشے کے ذریعے شہر میں سپلائی کیا جا رہا تھا۔
کارروائی کے دوران رکشے میں بنائے گئے خفیہ خانوں سے 24 کلو گرام اعلیٰ معیار کی چرس برآمد کی گئی، جس کی مالیت لاکھوں روپے بتائی جا رہی ہے۔ پولیس نے موقع پر موجود 3 ملزمان، عظمت خان، اختر منیر اور عمران گل کو گرفتار کر لیا۔
ایس ایس پی ملیر عبدالخالق پیرزادہ کے مطابق ملزمان منشیات کی ترسیل اور فروخت کے لیے جا رہے تھے کہ پولیس نے بروقت کارروائی کرتے ہوئے انہیں دھر لیا۔ گرفتار افراد کے قبضے سے موبائل فونز اور نقد رقم بھی برآمد ہوئی، جبکہ منشیات کی ترسیل میں استعمال ہونے والا رکشہ تحویل میں لے لیا گیا ہے۔
پولیس نے ملزمان کے خلاف مقدمہ درج کرکے مزید تفتیش شروع کر دی ہے۔
