پاکستان ریڈ بال ٹیم کے ہیڈ کوچ سرفراز احمد نے ویسٹ انڈیز کے خلاف پہلے ٹیسٹ میں شکست پر مایوسی کا اظہار کرتے ہوئے کہا ہے کہ قومی ٹیم کی بیٹنگ توقعات پر پوری نہیں اتری۔ پریس کانفرنس میں انہوں نے کہا کہ دوسری اننگز میں بیٹنگ لائن کی ناکامی تشویشناک ہے، جبکہ پہلی اننگز میں برتری حاصل کرنے کا اچھا موقع ضائع کیا گیا۔
سرفراز احمد کا کہنا تھا کہ امام الحق اچھی بیٹنگ کر رہے تھے، اگر وہ مزید صبر سے کھیلتے تو پاکستان کو اہم لیڈ مل سکتی تھی۔ انہوں نے ویسٹ انڈیز کی آٹھویں وکٹ کی 61 رنز کی شراکت کو بھی میچ کا اہم موڑ قرار دیتے ہوئے کہا کہ اس پارٹنرشپ کو روکنا چاہیے تھا۔
ہیڈ کوچ نے بتایا کہ پچ کو مدنظر رکھتے ہوئے پانچ بولرز کے ساتھ میدان میں اترنے کا فیصلہ درست تھا، تاہم امید ہے کہ ٹیم دوسرے ٹیسٹ میں بھرپور کم بیک کرے گی۔ انہوں نے عندیہ دیا کہ اگلے میچ کے لیے پلیئنگ الیون میں تبدیلیاں کی جا سکتی ہیں اور سعود شکیل و عبداللہ شفیق کی شمولیت کا فیصلہ کنڈیشنز کو دیکھ کر کیا جائے گا۔
واضح رہے کہ ویسٹ انڈیز نے دو ٹیسٹ میچوں کی سیریز کے پہلے مقابلے میں پاکستان کو 90 رنز سے شکست دے کر سیریز میں 0-1 کی برتری حاصل کر لی ہے۔
