اسرائیلی وزیراعظم بنیامین نیتن یاہو کے دورۂ امریکا کے موقع پر واشنگٹن ڈی سی میں سینکڑوں افراد نے احتجاجی مظاہرہ کرتے ہوئے امریکی حکومت سے مطالبہ کیا کہ وہ بین الاقوامی فوجداری عدالت کے جاری کردہ وارنٹ گرفتاری پر عمل درآمد کرے۔
عالمی میڈیا کے مطابق شدید بارش کے باوجود مظاہرین فلسطینی پرچم اور بینرز اٹھائے وائٹ ہاؤس کی جانب مارچ کرتے رہے، جبکہ احتجاج کے دوران سکیورٹی کے سخت انتظامات کیے گئے اور پولیس کی بھاری نفری تعینات رہی۔
رپورٹس کے مطابق مظاہرین کا ایک گروپ جارج ٹاؤن کے فور سیزنز ہوٹل کی لابی میں بھی داخل ہوگیا، جہاں بنیامین نیتن یاہو عشائیے میں شریک تھے۔ مظاہرین نے ہوٹل کے ریستوران تک پہنچنے کی کوشش کی، تاہم سکیورٹی اہلکاروں نے انہیں روک کر عمارت سے باہر نکال دیا۔
احتجاج کے دوران مظاہرین نے نیتن یاہو کے خلاف نعرے بھی لگائے، جن کی ویڈیوز سوشل میڈیا پر تیزی سے وائرل ہو رہی ہیں۔
