کھٹمنڈو (10 ستمبر 2025): نیپال میں پُر تشدد مظاہروں میں نیپال کے سابق وزیراعظم جھالا ناتھ کھنال کی اہلیہ کو زندہ جلا دیا گیا۔
نیپال کی مقامی میڈیا کے مطابق منگل کو میں نیپال کے سابق وزیراعظم جھالا ناتھ کھنال کے گھر کو حکومت مخالف پرتشدد مظاہروں کے دوران نذر آتش کر دیا گیا۔
میڈیا رپورٹ کے مطابق گھر میں آگ لگنے کے باعث نیپال کے سابق وزیراعظم جھالا ناتھ کھنال کی بیوی آگ کی لپیٹ میں آگئیں، جس کے باعث وہ جاں بحق ہوگئیں۔
واضح رہے کہ نیپالی حکومت نے سوشل میڈیا سائٹس سمیت 26 ویب سائٹس پر پابندی عائد کی جس کے بعد نیپال کے نوجوان کرپشن کے خلاف سڑکوں پر نکل آئے تھے۔
نیپال کے وزیراعظم کے پی شرما اولی نے پُرتشدد ہنگاموں کے بعد اپنے عہدے سے استعفیٰ دے دیا تھا، نیپال کے دارالحکومت کھٹمنڈو اور دیگر شہروں میں کرفیو کے باوجود نوجوانوں نے صدر رام چندر پوڈیل اور وزیراعظم کے پی شرما اولی کی رہائش گاہ کو نذرِ آتش کر دیا تھا جس کے بعد پابندی ختم کردی گئی تھی۔
اس پُرتشدد مظاہروں کے بعد ملک کی سیکیورٹی فوج نے سنبھال لی، فوج نے ملک میں ہونے والے تشدد کے خاتمے پر زور دیا ہے۔
دوسری جانب اقوام متحدہ کے انسانی حقوق کے ہائی کمشنر وولکر ترک نے خبردار کیا کہ “تشدد جواب نہیں ہے” اور انہوں نے نیپال کی سیکیورٹی فورسز سے تحمل سے کام لینے کی اپیل کی ہے۔
